陳百祥爆曾志偉為炒余詠珊才入主TVB
.
陳百祥今晚出席EYT《歡樂今宵》聯歡晚宴，入席前受訪，談到甘國亮傳患失智症被送院，阿叻謂當年他拍過甘國亮《青春熱潮》一劇之後才正式加盟無綫，他笑道：「佢係同我老婆打麻雀，然之後發掘我。」
他稱：「佢（甘國亮）當年就係用《Disco Fever》呢個idea，因為冇咩人可以一路做戲一路唱歌，佢就話，『你（阿叻）唱歌㗎喎，不如為你整套劇？』佢係為我哋諗，《青春熱潮》全部我哋自己填詞，我同賈思樂、張國強、任達華第一批劇集唱歌。」
阿叻稱為甘國亮的健康狀況擔心，但暫未知詳情，又說：「我成日都話，生老病死係唯一最公平，冇人控制到，所以一定要淡然去睇，只不過係…咁近嘅朋友，例如阿緊（馮淬帆）同我拍咗八、九套戲，甘生根本係發掘我嘅恩師，一定會有傷感，但我又唔覺得呢個傷感係乜嘢嘢。呢個係我自己內心嘅感覺，唔需要同人share。」
他稱最近一次見甘國亮已是兩年前，「因為COVID，大家都見唔到。佢身體狀況好好、我每年生日都會請佢。」表示一定會探望他。
至於馮淬帆離世，阿叻稱讚對方是一代笑匠，「佢嘅演技，你係冇得模仿，我都係學緊佢，但學唔到。收縮水，王晶其實冇寫到點樣做，佢做出嚟，引到大家好開心。一個許冠文，一個馮淬帆，我認為，喺我嘅年代裏面，超越我嘅兩個人。」
問到可知道馮淬帆生前近況， 阿叻說：「我唔知佢近況，但睇佢個樣都知佢唔會好好啦！同埋佢大我好多㗎嘛，雖然我都75 ，佢過咗八字吖嘛。我覺得呢啲係實會發生嘅事…」
早前阿叻受訪，稱電視台已是「黃昏事業」，又稱「而家冇人要靠TVB 」。問及老友兼無綫總經理(節目內容營運) 曾志偉 可有叫他少提TVB？阿叻反問：「佢可以唔俾我講TVB嘅嘢咩？我係我，佢係佢。我係講事實之嘛，我唔係針對佢。所有電視台都係黃昏嘅事業，唔該你睇吓財經版，大家蝕幾多錢呀？係啲有錢人先攞出嚟蝕，但TVB唔係有錢人嚟㗎喎，TVB係基金蝕㗎喎 ！你唔同HoyTV，係新世界蝕緊；NowTV係李生蝕緊。」
「佢哋好明白㗎，但佢哋嘅aim做緊乜，佢哋自己至知。我好早諗咗啦，dot com吖嘛，一定係網上㗎啦！但網上當時收唔到錢， 東方魅力去到三十幾億市值，所以我從來冇破過產，從來都係賺錢嘅！」
阿叻續說：「不過，而家有咗支付寶、PayMe，所以直播先至咁成功，物流先至成功嘛！咁梗係要轉型㗎啦！我哋掂吓都八位數字嘅直播，TVB點樣做到呀？做唔到㗎嘛！佢得百幾萬人睇！得二十點之嘛。」
「我做《運財至叻星》，average都三十點呀！咁係咪一路落緊低潮呀？邊個都救唔到，唔關曾志偉事，唔關任何人事，係個行業嘅事。我冇針對佢，亦冇針對TVB，我係講咗真話出嚟啫！」
至於成龍 遭「成家班」前成員火星 批評壓榨薪酬兼苛刻一事，阿叻表示跟成龍從未合作過，又笑言兩人在東魅是「老闆、僱員」關係，阿叻是副主席，「成龍同梅艷芳係僱員…唔好講僱員，係partner，夾錢嘅要！個個月要夾六萬六，包括鄺美雲。俾得最少錢嗰個叫王敏德，畀三千三。我哋66個artist，我諗出嚟㗎 個idea！」
續問阿叻跟成龍認識當年，對方是一個怎樣的老闆？他說：「佢冇做過我老闆喎！我又未做過佢老闆，我同佢做個partner，我淨係覺得佢個人根本就係好戇直，好正常嘅一個人，就係咁多啦。」
最後阿叻謂，電視台雖然是黃昏事業，但一定要存在：「黃昏嘅事業唔代表執笠，等如而家好多鋪都空租㗎，大家都唔賣嘢咩？要有一個轉接㗎嘛！電視台要轉接㗎嘛，我冇講個轉接點出嚟咋嘛！個問題係，如果叻嘅management，叻嘅，嗰個叫 陳慶祥 （曾任無綫總經理），你問吓佢，電視台應該點樣轉吖！唔應該問我，因為我唔係總經理。」
至於曾志偉，阿叻直言：「好朋友，我咪勸佢唔好做囉（總經理一職）！我話電視冇得做㗎喇！但佢入去唔係因為電視冇得做吖嘛，我知佢入去想做乜啦！佢想炒咗 余詠珊 之嘛！佢入去唔係想做嘢吖嘛！」阿叻語出驚人，續說：「你哋要我講真話，我咪講真話囉！」
問及何以曾志偉想炒余詠珊，阿叻稱余曾為東魅效力，「入咗去TVB之後，余詠珊唔聽佢講吖嘛！你唔記得曾志偉之前同佢好大conflict咩？當時志偉唔話得事，就係咁簡單。即係，你老闆突然做咗你夥記，咁啲夥記唔聽你講，你又做番佢老闆，咁咪炒咗佢囉！就係咁簡單！你哋唔知咋嘛！」
TVB[超话]
