【明報即時】吳若希完成佛山站演唱會 盼當地定居：好有親切感 「吳若希《Gossip of Me》演唱會」佛山站，日前圓滿完成。（大會提供）「吳若希《Gossip of Me》演唱會」佛山站，日前圓滿完成，全場爆滿，Jinny把她首本名曲帶到佛山，送給當地歌迷，請來Aster劉芷君為特別嘉賓。Jinny甫出場唱了《炊煙》和《暗湧》，之後她說：「今年係我入行第15年，今次演唱會主題係《Gossip of Me》，咁多年嚟唔開心又係咁樣過，𠵱家大咗，又經歴咗咁多事，我覺得只要做好自己，無論遇到任何Gossip，我都係最好嘅吳若希。」台下有觀眾大叫要和Jinny一起變老，Jinny笑說：「同我一齊變老？好吖，我希望我可以唱到40歲，今年33歲，仲有7年可以唱，之後我就退休，但係唔緊要嘅，我覺得每一次要珍惜我哋可以見到面嘅機會，」換過另一套服飾後，Jinny回到台上並表演《召喚絲》、《可以背負更多》和《眼淚的秘密》，她到台下和觀眾握手互動，場面熱鬧。接著Aster出場又唱又跳經典國語歌《Bad Boy》，Astor說：「很開心和榮幸可以到佛山，做Jinny演唱會嘉賓，今次是很好學習機會，希望之後有更多機會和大家見面。」及後Jinny唱出《錯過了》、《火和火柴》、《我懂了》、《我沒有傷心》，「我好想多謝我嘅Fans，有咗佢哋我先可以收到咁多愛，由出道到𠵱家呢15個年頭，中間發生好多事，有一班人依然喺我身邊陪住我，所有人我都好珍惜，多謝佢哋曾經係我生命之中出現過，好多謝各位今晚嚟到現場支持我，送畀大家《感激跟你能夠遇見》。」Jinny亦一時感觸流淚，最後她以《越難越愛》為個唱佛山站，寫下圓美句號。完騷後Jinny說：「終於完咗《Gossip of Me》佛山站，呢度係我非常熟悉嘅地方，因為《巨塔之后》就係喺度開機同拍攝，啲回憶即刻返晒嚟，諗起係度曾經住咗3個月，當然呢3個月係好開心同舒服，好有親切感，好似返咗第二個屋企。加埋觀眾反應非常好，語言接近，同聲同氣，加埋環境好好，大家又鍾意聽我嘅歌，有機會嘅話我真係想係佛山定居。」（即時娛樂）
